Жастарға арналған мереке бар ма?

Жастар – қоғамның белсенді әрі қозғаушы күші. Ел болашағы жастардың қолында демекші, салқынқандылықтан, үлкенді сыйлаудан, сөзге тоқтаудан айнымай, достыққа адал, бауырмал, кеңпейіл болса, халық атына сөз келтіретін ұстамсыздық атаулыдан аулақ болса ел ертеңінің расында да жарқын болғаны.

Десе де бүгінде жастар арасында мәселе жоқ емес. Солардың бірі – еліктеушілік. Жат елдің мәдениетін жанына жақын тартқан жастар батыстық әндерді әуелетіп, мерекелерінің мерейін асырып, ер-азаматтарымыз сырғаланған жігіт сымақтардың соңына ілесіп, бүтін киімді жыртыққа айырбастап күннен күнге таңқалдыруда. Өкініштісі бүгінгі қоғамның бұл қылықтарға еті үйреніп, қалыпты құбылыс ретінде қабылдауы.

Субмәдениет ішіндегі ән, сырғаланған жігіттер, жыртық киім жайында айтылып жүргелі қаншама, әлі күнге дейін айтылып та келе жатыр. Ал өзге елдің мерекесін тойлап жүрген жастарға не айтамыз? Түп тамыры АҚШ-нан шыққан Хэллоуин, ғашықтардың пірі болған Әулие Валентин, көктем мезгілінің келуімен байланысты Үнді елінен сіңген Холи мерекелері бүтін бір ұлтымыздың адасуына әкеп соғуда. Өзгенің жын-ойнағын емес, салт-дәстүріміз бен ұлттық дүниетанымымызға жақын, ешбір әбестігі жоқ төл мерекелерімізді неге айлап тойламасқа?!

Ендігі бұл тұста туындайтын сұрақ: жастарға арналған мереке неге жоқ? Қарап отырсақ, ресми Тəуелсіздік күні, Конституция күні, Тұңғыш Президент күні, халықаралық деңгейдегі 8-наурыз әйелдер күнін шетке ысырсақ, ұлыстың ұлы күні – әз-Наурыздан өзге жастар тойлайтын мереке қалмаған-ды. Расында Хэллоуин, Әулие Валентин, Холи мерекелерін орнын басатын жастарға арналған мейрамның табылмағаны ма? Көңіл жұбататын жалғыз 15-сәуірдегі «Қозы Көрпеш – Баян Сұлу» ғашықтар күнінің өзі ресми түрде бекітілмеген.

Қасиетті қазақ халқы мәні мен мағынасы зор салт-дәстүр, әдет-ғұрықа өте бай. Меніңше, осы салттарымызды зерттеп, арасынан қаймағын сүзіп, жастарға жөн-жоралғысын көрсетіп, насихатталар жыл сайынғы дәстүрге айналдырып, атау беріп жастар мерекелері ұйымдастырылып ресми түрде бекітілсе нұр үстіне нұр болары сөзсіз.

Иә, жастар еліктейді, өзге елдің сойылын соғады дейміз, байқасақ оған себеп жастарға арналған мерекелердің аздығы. Әйтсе де, жақсыға сенейік, жақсы күндерден үміт күтейік! Ақыр түбінде жастарға төнген өзге елдің қара бұлты ашылып, қазақ жастарының ойы мен жолы түзеліп, өз елін бақытқа бастар азамат боларына, бүкіл қазақ қауымының абыройын әлемге танытарына сеніміміз мол.

Ақерке Сабырқызы

"Тұран" университетінің студенті