Театр - көркем өнердің ошағы, мәдениет ұйытқысы. Уақытына қарамай қашан да адам мен тарихты, әр заман мәдениетін тоғыстырушы мекен. Қазақ театрында қаншама тарихи рөлдер сомдалып, қаншама жан тебінерлік спектакльдер көрермен назарына тарту етілді. Әлі де ойналып, сомдалып халықтың оң бағасын алып жүр.
Өткенімізді тарих беттерінен оқып шығу бөлек те, көзбен көріп, құлақпен естіген бөлек-ті. Осы тұста Ғ. Мүсірепов атындағы Қазақ Мемлекеттік академиялық Балалар мен Жасөспірімдер театрында көрсетілген «Фатима» қойылымын айтқым келеді. Қазақтың Б. Сүлеев, І. Жансүгіров, М. Әуезов сынды зиялыларына қадірлі жар, балаларының аяулы анасы болған Фатима Ғабитованың өмір жолын көріп отырып, жүрегің қарс айырылып, көзің жасқа толады. Жеті баланы дүниеге әкеліп, қазақтың ұлы тұлғаларына қиын- қыстау заманда сүйеніш бола білген Фатима аштықты, қанды репрессияны, Ұлы Отан соғысында, қорған болған азаматтарының қазасын да бастан кешіреді.
Бір ғана Фатиманың тағдыры, сол кездегі бүкіл қазақ халқының тағдыры. Осылайша, жалпы қазақтың басынан өткен сұрапыл кезеңдерді бір ананың тағдыры арқылы бейнелейді. Әйел заты болғанымен, сағы сынбай қиындыққа қасқая тұрып, жақсылықтан үміт үзбеген Фатима қойылымды тамашалаған барша көрерменге, соның ішінде әйелдер қауымына үлгі болары сөзсіз.
Қорыта айтқанда, спектакль ойлағанымнан да асып түсті. Мөлдір махаббатты, азапты тағдырды, сұрапыл заманды аз ғана уақыт болса да көзім көріп, тағы бір рухани байып қайттым.
Дина Максотова
Comments