Адамзат баласы білім маңызының жоғары екенін әуел бастан-ақ білген. Білім адам баласына өмірдің жарқын есіктерін ашатын кілт. Әуелгі біліміміз алтын ұя мектебімізден бастау алды. «Тарыдай болып кіресің, таудай болып шығасың» демекші баршамыз мектеп қабырғасында білім алып, болашаққа деген алғашқы қадамымызды жасадық. ҰБТ тапсырған сәтте әрқайсысымыздың кеудемізде, көкейімізде бір арман – жоғары оқу орнына түссем екен деген тілек болғаны да шындық. Жарқын болашағымның алғашқы кірпішін қалаймын деп арман қала Алматығы ағылған талапкерлер қаншама.
Студенттік шақ өміріңнің ең қызықты сәті дегенді үлкендерден жиі естиміз. Ал сол қайталанбас студенттік өміріңді қайталанбастай жоғары оқу орынында өткізсең ше? Қазіргі таңда орта білімнен соң, жоғарғы оқу орнында оқу әркімнің де арманы. Әрине қиын-ақ. Бірақ мен өзімді бұл тұста жолы болған деп есептеймін. Себебі мен оқып жүрген университет Қазақстандағы ең үздік он ЖОО-ның құрамына кірген «Тұран» университеті. Біздің университет жастардың болашағына жол ашады, сол арқылы ел экономикасының дамуының алғышарттарын қалыптастыруда. Ұстанымы – баршаға арналған университет. Біздің университетте армандарын іске асырып, болашаққа нық сеніммен қадам басып, жоспарларын жүзеге асыруға әрбір жанның мүмкіншілігі бар. «Тұран» университеті тек бір ғана саланы қамтымайды. Материалдық-техникалық, талап-шығармашылық, қаржылық және ұйымдық ресурстарын пайдалана отырып, әртүрлі салалардағы мамандарды дайындайды. Алғашқы күндерден бастап-ақ университет студенттерін түрлі іс-шаралармен таныстырып, олардың қоғамдық жұмысқа деген қызығушылығын және оқуға деген ынтасын, құлшынысын арттырады. Мұнда әралуан ұжымдар мен белсенді топтар жұмыс жүргізуде. Оқудан тыс бос уақытымызды тиімді пайдалануымыз үшін де бар жағдай жасалған. Студенттер «Тау Тұранға» экскурсияға және лагерьлерге баруға мүмкіндік алады. Сонымен бірге студенттердің өзін-өзі дамытуы үшін тренингтер мен ғылыми-әдістемелік семинарлар өткізіліп, тіптен шетелдік ғалымдарда арнайы шақыртылады.
Ерекше атмосфера, позитивті көңіл-күй, сапалы білім, белсенді студенттер, білімді мамандар тобы мұның барлығы да «Тұран» университетіне тән. Ендігі сәтте мен нық сеніммен, өз тәжірибиеме сүйене отырып, «Тұран» университеті жаңа белестер мен жарқын болашаққа жол салатын, әр адамды өзіндік тұлға ретінде қалыптастыруға үйрететін, ең үздік білім беретін мекеменің бірі әрі бірегейі дегім келеді. Қаншама табысты түлектерді түлеткен бұл университеттің бізде үлгі тұтар үздігіне, мақтан тұтар мақтанышына айналамыз деген зор сенімдемін. Университетімнің кешегісі кемел, бүгіні ертеңгі тарих. Біздер болашақты қалыптастырушылар және жасаушылармыз. Сондықтан біздің де мойынымызға артылар жауапкершілік мол. Сол жауапкершілікті нық сеніммен арқалап жүру үшін де бізге таусылмас әрі тозбас ақыл-білім қажет. Жоғарыда аталғандай біз үшін барлығы жасалған, тек сол қолда бар алтынның қадірін білсек болғаны.
Гулдана Ермекқызы
Comments