ХXI ғасыр – білімділердің оза шабатын кезеңі. Тұңғыш президентіміз Н.Ә. Назарбаев білім мәселесіне көптеп көңіл бөліп, жастарымыздың білім алуына үлкен мүмкіндіктер ашты. Мысал ретінде, әлемдік стандартқа сай келетін жоғары оқу орындары мен мектептерімізді айтсақ болады. Дәл сондай әлемдік стандартқа сай келетін жоғары оқу орындарының бірі «Тұран» университеті. Қаншама білімді жастардың жолын ашқан бұл университетте 25 мамандық бойынша бакалавриат, 14 мамандық бойынша магистратура, докторантура бойынша 3 мамандық оқытылады. Жоғары санаттағы оқытушылар жұмыс жасайды. Атап айтсақ, 55 ғылым докторы, 215 ғылым мен доцент кандидаттары және тағы басқалары. "Тұран" университеті шетелдік оқу орындарымен жылы қарым-қатынаста. Қытайдан, Африкадан, Түркиядан, бірнеше елдермен студенттер алмасып, 2 диплом алып шығуға жағдай жасалған.
Ал мен "Тұранды" неліктен таңдадым?
Жаз айы, тамыздың тамылжыған күндері мен түндерін өткеріп, Әл-Фараби университетіне тапсырған мен, түсе алмағанымды естідім. Арман, мақсат, үміт бәрі өшті. Гранттың барлығы бөлініп, студенттердің түскені қуанып, түсе алмағаны ақылы оқуға тапсырып жатты. Сондағы ой, енді осы үлкен қалада қалып оқуды жалғастырайын ба, әлде өз қалама оралайын ба? Осы сұрақтардың үлкен жауабы, жастық шақтың мәңгілік мекені, білімнің қайнар көзі — Тұран университеті. Тұран университетінің ректоры Алшанов Рахман Алшанұлы тағайындаған грант иегері атандым. Қуанышым қойныма сыймай, төбем көкке жетті. Бұл менің өмірімнің шаттыққа толы жаңалығы, сәтті жасалған қадамым еді. Ал бүгінде, бірінші курсты да аяқтаппын. Өткен бір жылға байланысты, айтатын қызықтар аз емес. Сабақтан тыс уақытымды ұйымдарға арнадым. Олар: «Энактус,Агитка, Жас Отан, Turan’s Trumps, Teart Turan, Sirius» және тағы да басқалары. Әсіресе жан-жақты дамуға жол ашатын «Sirius» клубы құрылғанына небәрі 3-4 жыл болса да, «Sirius Cup» деп аталатын халықаралық, әлемдік турнирлерді жоғары дәрежеде өткізіп, мектеп лигасының бас жүлде иегерлеріне төрт жылдық грант тарту етті, студенттер лигасына қомақты қаражат бөлді. Бұл тек бір ұйымның ғана жетістігі. Осыған ұқсайтын қаншама ұйымдар бар. Ұйымдар — жеке адамның дамуына, қоғамдық өмірге белсенді араласуына ықпалын тигізеді.
Сонымен қатар, университеттің ұйымдастыруымен іс-шаралар жиі өтіп тұрады. Ауқымдыларының бірі, қалалық деңгейде өтетін «Жас Тұран». Байқауда әр студент өз жобасын ұсынып, қоғамға қандай әсерін тигізетінін түсіндіріп, қорғап шығады. "Білімді ұрпақ —ұлт болашағы" демекші, жастар университет қабырғасында ірі жобаларды қорғап, ел ертеңі үшін аянбай еңбек етсе, жарқын болашақ күтетіні шүбәсіз. Бұл тек университет қабырғасында өткізген өмірімнің кішігірім ғана көрінісі.
Жалпы қорытындылай келе, арманыма бір қадам жақындатқан университетке деген алғысым шексіз. Менің ҚазҰУ университетіне түспей қалуым, айқын жолға бағыттады. Тамыры тереңде жатқан, тарихы терең «Тұран» университеті армандардың тоғысқан мекені!
Дана ЖОБАЛАЕВА
Comments