"Өзіне сенетіндер мен табысқа ұмтылатындар үшін". Бұл ұранға айналған сөздер әр Тұрандық студенттің бүгінгі мақсаты және жарқын болашағы жолында әрекет ету үшін мотивация. Алайда Тұран тек жетістікке жетуге жол ашатын мекен ғана емес, мүмкіндіктер мекені. Мұндай тұжырымға келуіме түрткі болған университеттің жыл сайын бітіруші түлектерге арналған “Grant Project” байқауы. Қоғамда болып жатқан өзекті мәселелерді қозғау мен жастардың біліктілігін арттыру жолында білім ордасы кездесулер мен кештер өткізуден, байқаулар ұйымдастырудан алдына жан салмайды. Игілігі мол істердің ішінде дәл осы жобаны тілге тиек етуімнің себебі, бұл білім бәйгесі "Тұран" дейтін білім ордасының алғашқы баспалдағына шығуыма себепкер болған.
Қазақстанның әр өңірінен Тұранның білімгері атанғысы келетін кез-келген түлек бағын сынай алатын байқау үш кезеңнен тұрады. Алғашқы кезең таңдаудың неліктен дәл осы оқу ордасына түскені жайлы эссе жазудан тұрады. Эссенің көмегімен тексеру тобының мүшелері, кімнің расында Тұранның тарланы болуға лайықты екенін анықтай алады. Келесі кезең ғылымның сан саласынан туындаған логикалық сауалдарға жауап беру. Егер сіздің ойлау қабілетіңіз дамыған, барлық білім саласынан хабарыңыз болса, бұл кезеңде жұлдызыңыз жанып, шешуші сынға өту ықтималдылығыңыз арта түседі. Ең ерекше әрі қобалжытар сәт — қорытынды кезең. Оған себеп әр қатысушы видео-сұхбат арқылы комиссия мүшелерімен тікелей байланыс орната алады. Аз ғана уақыт ішінде өз жетістіктеріңді, Тұранды таңдаудағы басты себептеріңді айтып, өмірлік мақсаттарыңмен толықтай бөлісу мүмкін емес. Алайда, әр студенттің бағытын көзқарасынан-ақ тани білетін оқытушылар үшін бес-он минуттың өзі жеткілікті болып есептеледі. Барлық үш кезеңнен абыроймен өткен қатысушылар ендігі кезекте байқау қорытындысын күтеді. Бағы мен бабы қатар шапқан, ой өрісі мен ертеңге деген мақсаты айқын жас түлек "Тұран" университетінің ресми түрде грант иегері атанады. Ұлттық бірыңғай тестілеуге жанын салып дайындалып, мектептен кейінгі білім жолының қай арнаға бұрылатынына алаңдаулы он бірінші сынып оқушысы үшін грант ұтып алу деген қандай бақыт, әрі арқаңнан ауыр жүк түскендей сезім екенін сөзбен айтып жеткізу мүмкін емес. Перзентінің болмашы жетістігіне қуанатын ата-ана үшін бұл үлкен жеңіспен пара-пар. Осы сезімдерді бастан кешіргіңіз келсе, сіз де еш қорықпастан өз бағыңызды сынап көрсеңіз болады.
Еліміздегі өзге де оқу орындарында өткізілетін осы бағыттағы жобалардың ішінде “Grant Project” ең тиімді әрі мүмкіндігі көп. Неге десеңіз, басқа білім ордасында жеңімпазды таңдау тест түрінде өткізіліп, грант иегерлерінің саны да шектеулі болады. Ал Тұранда әр қатысушымен тікелей сөз алмасуға мүмкіндік бар, әрі екінші және үшінші орын иегерлеріне бір және екі жылдық грант табысталады. Мұндай мүмкіндікті Тұранның түлектерге берген тартуы деп қабылдаймын. Тұранда өткен бір жылдық тәжірибеме сүйеніп, расында бұл өзіңді дамыту жолында нық сеніммен қадам жасай алатын орта деп айта аламын. Өнері мен өресі биік жастардың ортасында қалыс қалып қоюға болмас. Ендеше жас түлек сен де өзіне сенетіндер мен табысқа ұмтылатындар бас қосқан "Тұран" тұғырынан өз орныңды тап. Бұл мақсатты жүзеге асыруда “Grant Project” таптырмас мүмкіндік. Мүмкін дәл сен Тұранның тартуының иегері шығарсың. Мақсаты айқын, істері нық, өзін де, қоршаған әлемді де дұрыс бағытта өзгерткісі келетін әр жасты "Тұран" құшақ жая қарсы алады.
Айым ЕРКІНБЕКҚЫЗЫ
"Журналистика" мамандығының 2-курс студенті
Comments